Ymchwilydd Lleoliad Trosedd

Pan fyddwch yn ymuno â'r heddlu, mae angen i chi gwblhau cyfnod prawf o ddwy neu dair blynedd fel Cwnstabl Heddlu cyffredinol. Mae hyn yn rhoi'r sgiliau a'r profiad sydd eu hangen arnoch i symud ymlaen yn eich gyrfa. Ar ôl hynny, gallwch chi symud i amrywiaeth eang o rolau cyffrous, megis arbenigo mewn gwaith fforensig.

Mae diddordeb mewn rolau fforensig wedi cynyddu'n gyflym yn y blynyddoedd diwethaf. Gyda datblygiadau technolegol yn y maes, mae heddluoedd wedi gallu defnyddio pŵer technegau fforensig yn gynyddol i helpu i ddatrys troseddau.

Fel Ymchwilydd Lleoliad Trosedd, eich rôl chi yw casglu tystiolaeth fforensig o leoliadau troseddau a fydd yn y pen draw yn arwain at ganfod ac erlyn troseddwyr. Byddwch chi'n prosesu lleoliadau troseddau gan ddefnyddio technegau arbenigol i ddelweddu, dal ac adfer tystiolaeth. Eich cyfrifoldeb chi yw casglu’r wybodaeth hon fel rhan o ymchwiliad.

Dyma ychydig mwy am yr hyn y mae bod yn Ymchwilydd Lleoliad Trosedd yn ei olygu:

• Byddwch chi'n gyfrifol am gadw, casglu ac asesu tystiolaeth mewn lleoliadau troseddau gan ddefnyddio technegau cipio digidol, fforensig ac olion bysedd.
• Byddwch chi'n datblygu ac yn gweithredu cynlluniau tymor byr o fewn pob ymchwiliad i gynorthwyo’r amcanion ymchwilio ehangach
• Byddwch chi'n trin tystiolaeth o ymchwiliadau yn unol â phrotocolau y cytunwyd arnynt i gynnal uniondeb, parhad a diogelwch y dystiolaeth ar gyfer prosesau ymchwiliol ac achosion llys
• Byddwch chi'n cynorthwyo ag ymchwiliadau trwy arsylwi, asesu a chofnodi pob agwedd ar leoliad y drosedd a’r amgylchedd uniongyrchol, gan sicrhau bod yr holl ganfyddiadau ar gael ar gyfer yr ymchwiliad ehangach.
• Byddwch chi'n cefnogi’r broses Cyfiawnder Troseddol drwy ddarparu Adroddiadau Fforensig Syml (SFR) cywir ac amserol, datganiadau a dogfennaeth arall
• Eich rôl chi yw nodi sefyllfaoedd lle mae angen cymorth arbenigol i ddatblygu ymchwiliad.

Fel Ymchwilydd Lleoliad Trosedd, mae mynd i ddigwyddiadau sy’n peri gofid yn rhan o’r swydd – mae’n hanfodol eich bod yn parhau i ganolbwyntio ar y dasg er gwaethaf amgylchiadau anodd. Ond byddwch chi'n derbyn yr holl hyfforddiant a chymorth sydd eu hangen arnoch i allu gwneud eich swydd.

Mae sgiliau brwd ar gyfer arsylwi a datrys problemau'n hollbwysig. Mae angen i chi allu rhannu problemau sy'n ymddangos yn syml i'w cydrannau a phenderfynu ar y camau gweithredu priodol. Mae angen swyddog trefnus ar gyfer y rôl hon, gan y bydd angen i chi brosesu a chategoreiddio llawer iawn o dystiolaeth wrth reoli nifer fawr o ymchwiliadau, yn effeithlon ac yn effeithiol.

Bydd tystiolaeth y byddwch yn ei chasglu'n cael ei defnyddio’n aml mewn achosion troseddol, felly mae’r gallu i gyflwyno tystiolaeth yn y llys a gwrandawiadau eraill yn hanfodol.